ഒരു ഉമ്മ കഥ

ബസില്‍ പൊയ്ക്കൊണ്ടിരുന്ന കാലം മുതല്‍ ഞാന്‍ അവരെ കാണുന്നതാണ്. വൈകുന്നേരം സ്കൂള്‍ വിട്ടു വരുമ്പോള്‍ ആ ചേച്ചിയും ചേട്ടനും സംസാരിച്ചു ചിരിച്ചു എപ്പോളും ഉണ്ടാകും ബസില്‍. ഒരുമിച്ച്. എല്ലാവര്‍ക്കും അറിയാം. അവര്‍ തമ്മില്‍ ലൈന്‍ ആണെന്ന്. ഞാന്‍ കേറുന്നതിനു ശേഷമുള്ള നാലാമത്തെ സ്റ്റോപ്പില്‍ നിന്നാണ് അവര്‍ കേറുക. ചേച്ചി മുന്പിലൂടെയും ചേട്ടന്‍ പുറകിലൂടെയും കേറും. എല്ലാരും അവര്‍ക്ക് വഴി മാറി കൊടുക്കും. മുന്പിലൂടെയും പുറകിലൂടെയും വരുന്ന അവര്‍ നടുക്ക് കണ്ടു മുട്ടും. സ്നേഹിക്കുന്ന ആ യുവ മിഥുനങ്ങളെ എല്ലാവര്‍ക്കും ഇഷ്ടമായിരുന്നു.

അങ്ങിനെയിരിക്കെ നമ്മുടെ ചേട്ടന്റെ മനസ്സില്‍ ഒരു മോഹമുദിച്ചു. ഒരു ഉമ്മ വേണം. ചേച്ചി ചേട്ടന് ചുണ്ടത്തൊരു ഉമ്മ കൊടുക്കണം. അവസരം കിട്ടുമ്പോളൊക്കെ ചേട്ടന്‍ ചേച്ചിയോട് ചോദിച്ചു കൊണ്ടേ ഇരുന്നു. ഇപ്പൊ തരും എന്ന രീതിയില്‍ ചേട്ടനെ ഒന്ന് ഉത്സാഹിപ്പിച്ചു ചേച്ചി എപ്പോളും ഒഴിഞ്ഞു മാറും. റോഡിലൂടെ പോലും ചേച്ചിയോട് ഉമ്മ ചോദിച്ചു പുറകെ നടക്കുന്ന ചേട്ടനെ കണ്ട് ഞങ്ങള്‍ പലപ്പോളും ചിരിച്ചു പോയിട്ടുണ്ട്.

വര്‍ഷങ്ങള്‍ മാറി മറഞ്ഞു. രണ്ടു പേര്‍ക്കും ജോലിത്തിരക്കായി. ചേട്ടന്‍ ഹൈദരാബാദ് ഉം ചേച്ചി ബാംഗ്‌ളൂര്‍ ഉം. അവര്‍ തമ്മില്‍ ബന്ധം ഇപ്പോളും ഉണ്ട്. പക്ഷെ പണ്ടുണ്ടായിരുന്നത് പോലെ അത്ര ശക്തമായിരുന്നില്ല. ചേട്ടന് ഭയങ്കര തിരക്കായി. ചേച്ചിയെ വേണ്ടത്ര ഗൌനിക്കാറില്ല. അങ്ങിനെയിരിക്കെ ഒരു ദിവസം പെട്ടെന്ന് ചേച്ചി ചേട്ടനെ വിളിച്ചു. ധര്‍മസ്ഥലയില്‍ വരണം. ചേച്ചി അവിടെ ഉണ്ട്. എന്താണെന്നറിയില്ല. സാധാരണ ചേട്ടന്‍ അത് കാര്യമായെടുക്കാറില്ല. പക്ഷെ ഇത്തവണ കാണാന്‍ പോകാന്‍ തീരുമാനിച്ചു.

ധര്‍മസ്ഥലയില്‍ ദശകാല അഭിഷേകം നടക്കുന്ന സമയത്താണ് ചേട്ടന്‍ അവിടെ എത്തിയത്. പത്തു വര്‍ഷത്തില്‍ ഒരിക്കല്‍ നടക്കുന്ന അഭിഷേക കര്‍മങ്ങളില്‍ പങ്കെടുക്കാന്‍ ദൂര സ്ഥലങ്ങളില്‍ നിന്നു വരെ ആളുകള്‍ എത്തിയിട്ടുണ്ടായിരുന്നു. സത്രങ്ങളെല്ലാം നിറഞ്ഞു കവിഞ്ഞിരിക്കുന്നു. എവിടെയും ചേട്ടന് ഒരു റൂം കിട്ടിയില്ല. ചേച്ചിയും ഒരു കൂട്ടുകാരിയും നേരത്തേ എത്തി ഒരു ഡബിള്‍റൂം എടുത്തായിരുന്നു. അങ്ങിനെ ചേച്ചിയുടെ റൂമില്‍ തന്നെ ചേട്ടന് തങ്ങേണ്ടി വന്നു. ഒരു കട്ടില്‍ കൂട്ടുകാരികള്‍കും ഒരു കട്ടില്‍ ചേട്ടനും.

അടുത്ത ദിവസം രാവിലെ തന്നെ ചേച്ചി ചേട്ടനെ വിളിച്ചുണര്‍ത്തി. അമ്പലത്തില്‍ പോണം. ചേച്ചി കുളിച്ചൊരുങ്ങിക്കഴിഞ്ഞിരുന്നു. ചേട്ടന്‍ കുളിച്ചു കഴിഞ്ഞ് വരുന്ന സമയത്ത് ചേച്ചിയുടെ കൈ ശ്രദ്ധിച്ചു. കൈ ആകെ മൈലാഞ്ചി ഇട്ടിരിക്കുന്നു. ചേച്ചിയുടെ ഇരു കൈകളും വിരിച്ചു വച്ച് ചേട്ടന്‍ നോക്കി. നല്ല രസമുണ്ട്. പക്ഷെ ചേച്ചി ചേട്ടന്റെ മാറത്തു വീണു പോട്ടിക്കരയുകയാണ് ചെയ്തത്. എന്താണെന്നറിയില്ല. പോയി വന്നതിനു ശേഷം എന്തോ പറയാനുണ്ടെന്ന് ചേച്ചി പറഞ്ഞു.

ചേട്ടന്റെ കൂടെ അമ്പലത്തിലേക്ക് പോകുന്നതിനു മുന്‍പ് ചേച്ചി കൂട്ടുകാരിയുടെ ചെവിയില്‍ എന്തോ പറഞ്ഞിട്ട് പോയി. അവര്‍ തിരിച്ചെത്തിയപ്പോള്‍ കൂട്ടുകാരി അവിടെ ഉണ്ടായിരുന്നില്ല. ചേച്ചിയുടെ തേങ്ങല്‍ കേട്ട് തുടങ്ങിയ ചേട്ടന്‍ തിരിഞ്ഞു കാര്യം തിരക്കാന്‍ തുടങ്ങിയപ്പോഴേക്കും ചേച്ചി പോട്ടിക്കരഞ്ഞിരുന്നു. പതുക്കെ പതുക്കെ കാര്യം വെളിവായി. ചേച്ചിയുടെ കല്യാണ നിശ്ചയം കഴിഞ്ഞിരിക്കുന്നു. ചേട്ടനെ അറിയിക്കാനുള്ള എല്ലാ ശ്രമങ്ങളും ചേട്ടന്‍ തന്നെ പാഴാക്കിയിരിക്കുന്നു. ഇപ്പോള്‍ ഒരു തിരിച്ചു പോക്കില്ലാത്ത രീതിയില്‍ എത്തിയിരിക്കുന്നു കാര്യങ്ങള്‍. ഇതു ഒരു പക്ഷെ അവരുടെ അവസാനത്തെ കാണല്‍ ആയിരിക്കും. ചേച്ചി ചേട്ടന്റെ അടുത്ത് വന്നു ചേട്ടനെ കെട്ടിപ്പിടിച്ച് ഒരു വാക്യം മാത്രം പറഞ്ഞു. "നീ എന്നോട് ഇതു വരെ ഒരുമ്മ മാത്രമേ ചോദിച്ചിട്ടുള്ളൂ. അത് ഞാന്‍ നിനക്ക് തരുന്നു". ചേട്ടന്റെ ചുണ്ടത്തും നെറ്റിയിലും ചേച്ചി അമര്‍ത്തി ചുംബിച്ചു.

ചേട്ടന്‍ പാടെ തകര്‍ന്നിരുന്നു പോയിരുന്നു. തളര്‍ന്നിരിക്കുന്ന ചേട്ടനെ ചേച്ചി തന്റെ മടിയില്‍ കിടത്തി.  ചേച്ചിയുടെ മടിയില്‍ ചേട്ടന്‍ തളര്‍ന്നു കിടന്നുറങ്ങി. കൂട്ടുകാരിയുടെ വാതിലില്‍ ഉള്ള മുട്ട് കേട്ടാണ് ചേട്ടന്‍ ഉണര്‍ന്നത്. വൈകുന്നേരമായിരിക്കുന്നു. അവര്‍ രണ്ടു പേരും ഒന്നും കഴിക്കാതെ ഒന്നും ഉരിയാടാതെ അത്രയും നേരം ആയിരിക്കുന്നു. ഉണര്‍ന്ന ഉടനെ ചേട്ടന്‍ തന്റെ സഞ്ചിയുമെടുത്ത്‌ തിരിഞ്ഞു നോക്കാതെ യാത്ര പറയാതെ പുറത്തേക്കിറങ്ങി നടന്നു. ചേട്ടന്‍ പോകുന്നത് കണ്ണീരോടെ ദൂരെ നിന്നും ജനാലയിലൂടെ നോക്കി കാണുകയായിരുന്നു ചേച്ചി.

പിന്നീടവര്‍ക്കെന്തു സംഭവിച്ചു എന്ന് എനിക്കറിയില്ല. ദൈവം അവര്‍ക്ക് നല്ലത് വരുത്തട്ടെ.